Send, hold, flash, slab? 喂，師兄你講乜呀？作為攀石新手可能會因為聽唔明啲術語而感到氣餒，所以我哋通過介紹一啲術語等大家可以融入得快啲，順便可以扮吓識野（話晒唔打得都睇得呀嘛 😉）。不過好明顯唔好亂用啦，呢啲野好易弄巧反拙嫁嘛。
牆嘅種類
第一樣你想學嘅係牆嘅種類，因為同你嘅安全同你要用到嘅技術都有關（有興趣可以睇番攀石抱石你要知）。同埋講真，一入去個gym就見到啲牆先。
Arete
呢種牆要求你爬上牆角，就好似爬上一棟建築物嘅邊咁。通常都會有一個幾明顯嘅角度，而攀爬者係可以捉住牆嘅邊爬上去嘅。Toe hook 同heel hook 係呢種牆上面都經常會被用到㗎（當我哋介紹技術嘅時候我哋就會向你哋介紹呢兩種hook）。
Overhang
同地心吸力對抗嘅牆!最癲嘅overhang 就好係下面roof 牆咁, 成個人倒吊, 真係少啲core 同力水都搞唔掂㗎！
Roof
因為香港樓底比較矮，所以比較少啲所謂嘅roof 牆, 不過會喺外國會見到好多㗎，尤其係lead climbing！個個都成個Spiderman 咁，你都咪話唔型，不過對新手嚟講可能幾有挑戰性。
Slab
同overhang同埋roof係完全唔同嘅牆。Slab牆要求你貼住牆，然後將重心放喺你雙腳慢慢咁爬 （咁當然如果你係V10嘅，咁你唔使理我話你要慢慢爬㗎啦）。
Vertical
Vertical 就最直接啦，就係普通嘅牆，基本上你屋企所有牆都係可以叫做vertical，係少咗啲hold㗎炸！